Það hefur verið skrifað svolítið um kviðslit á þessu vefsvæði og að menn hafi farið í aðgerð líkt Gvendur á eyrinni forðum; kviðslitsaðgerð. Þannig vill til að við Benedikt fórum báðir í kviðslitsaðgerð á fyrstu vikum ársins. Enda fór um alla hér á fyrirtækinu sem spurðu í angist sinni hvort þetta væri nokkuð smitandi. Ég fékk eins konar pítsutilboð, tveir fyrir einn, tveir skurðir í sömu törninni. Enda nýtti ég mér það, og hugsaði með mér þegar frúin leiddi mig með svolítið vankaðan út úr Domus Medica, að þetta hefði verið góður bissness. Það var kominn tími til að ég græddi einu sinni.

Á laugardaginn vann ég einstök afrek. Gekk á tvö fjöll, fékk mér humar í hádeginu og svindlaði mér í fyrsta sinn inn á safn á eldri borgara afslætti. Þetta síðasta er að vísu ekki hárnákvæmt, en ég kem að því síðar.

Afmælisdagurinn byrjaði með tveimur draumadísum. Það var ekki amalegt að fá gjafir frá tveimur Vigdísum í morgunsárið. Vigdís litla gaf mér mynd eftir sig með langri skýringu, meira að segja af mér og ömmu hennar og nöfnu, nýkomnum úr flugvél. Ég hefði auðvitað þekkt okkur án skýringa, sérstaklega leynir svipurinn á Vigdísi ömmu sér ekki.