Heimur gefur út fjölmörg rit, fimm tímarit sem seld eru í áskrift og lausasölu og upplýsingarit fyrir innlenda og erlenda ferðamenn.

Vís­bending, tímarit um viðskipti og efnahagsmál er gefin út vikulega að með­töldu veg­legu jólablaði. Auk þess koma út nokkur tölublöð af Vísbendingu-Íslensku atvinnulífi sem er rit um einstaka atvinnugreinar. Áskriftarverð er 4.200 kr/mán. (m/vsk). Blöðunum er safnað saman í möppu. Jólablað er með fjöl­breyttu efni. Í Vísbendingu birtast greinar um efnahagsmál og viðskipti eftir færustu sérfræðinga þjóðarinnar. Greinar eru hnitmiðaðar og skrifaðar á skiljanlegu máli. Vísbending hefur komið út síðan árið 1983. Ritstjóri er Benedikt Jóhannesson.

Frjáls verslun er elsta og helsta viðskiptatímarit landsins. Það hefur komið út síðan árið 1939. Blaðið birtir viðtöl við menn í atvinnulífi og stjórnmálum, greinar um atburði líðandi stundar og fjallar um margvíslegt efni sem snýr að stjórnendum og starfsmönnum fyrirtækja. Hvergi birtast jafnmargar myndir úr fyrirtækjum landsins. Á árinu koma út 11 tölublöð af Frjálsri verslun. Þar með er talin bók með yfirliti um 300 stærstu fyrirtækin. Í ágúst kemur út blað um tekjur 2,400 einstaklinga. Meðallengd blaðsins er nú yfir 100 blaðsíður. Ritstjóri er Jón G. Hauksson

Tölvuheimur – PC World Iceland er gefinn út samkvæmt sérstöku samkomulagi við PC-World í Bandaríkjunum. Hér á landi kom blaðið fyrst út árið 1995. Í Tölvuheimi birtast fréttir úr geira upplýsingatækni, frásagnir af nýjum hugbúnaði, leikjum og ýmis góð ráð eru birt til þess að auðvelda fólki að fá tölvur sínar til að láta að stjórn. Fyrsta tölublað Tölvuheims hjá Talnakönnun kom út í ágúst 2000. Tölvuheimur er núna eingöngu gefinn út á netinu á www.tolvuheimur.is.

Á miðju ári 2002 keypti Heimur tímaritaútgáfu sem kennd hefur verið við Iceland Review. 

Iceland Review var stofnað árið 1963 og hefur síðan þá flutt umheiminum frásagnir af Íslandi, náttúru þess og menningu. Tímaritið er verðugur fulltrúi Íslands á erlendri grund og mörg fyrirtæki hafa sent viðskiptavinum sínum erlendis blaðið í gjafaaáskrift. Blaðið er helsta tímarit um Ísland á ensku og að því eru áskrifendur í meira en 100 löndum. Iceland Review er gefið út fjórum sinnum á ári. Ritstjórar eru Bjarni Brynjólfsson og Páll Stefánsson.

Flugritið Atlantica er næstelsta rit sinnar tegundar í Evrópu.  Aðeins rit KLM í Hollandi er eldra. Ritinu er dreift í öllum vélum Flugleiða og það kemur árlega fyrir sjónir um milljón flugfarþega. Ritið er á ensku og flytur margvíslegan fróðleik um Ísland, menningu þess, viðskipti og listir, sem og greinar um þjóðlífið og áhugaverða ferðamannastaði innan lands sem utan. Atlantica kemur út sex sinnum á ári. Ritstjóri er Krista Mahr.

Tímaritinu Skýjum er dreift í öllum vélum Flugfélags Íslands en það er líka selt í lausasölu. Ritið flytur fjölbreytt  efni um alla þætti þjóðlífsins. Ritið kemur út fimm til sex sinnum á ári.  Ritstjórar eru Benedikt Jóhannesson og Jón G. Hauksson.

Issues and Images kemur út þrisvar á ári og hefur fjölbreytt efni um menningu, viðskipti og stjórnmál. Ritinu er dreift í samvinnu við Útflutningsráð. Ritið kom fyrst út árið 2005.

Heimur gefur út fjölmörg ferðarit. Helsta ritið, Á ferð um Ísland og fylgifiskar þess á ensku og þýsku koma út í apríl. Ritin eru yfir 200 bls. að stærð og veita margvíslegan fróðleik um náttúru landsins og þjónustu við ferðamenn. Upplag er stórt, 35 þúsund eintök á ensku, 30 þúsund á íslensku og 25 þúsund á þýsku. Ritstjóri er Ottó Schopka. Hér má fá ritið á vefnum.

Golfhandbókin kom út í lok apríl. Upplagið 13.000 eintök. Hún er gefin út í samvinnu við Golfsamband Íslands. Í henni er að finna upplýsingar um alla golfvelli landsins iog starfsemi allra golfklúbba, auk þess sem í henni birtist skrá yfir öll golfmót.

What's on kemur út tólf sinnum á ári. Ritið er gefið út í um 10 þúsund eintökum hvert tölublað. Tímaritið er um 60 bls að stærð og í því birtast gagnlegar upplýsingar um Reykjavík og nágrannasveitarfélögin sem og listi um það helsta sem fram fer á hverjum tíma. Ritstjóri er Ingvar Kristjánsson.
Hér má fá ritið á vefnum.

Íslandskort á ensku kemur út í janúar í 150.000 eintökum. Á sama tíma kemur út Reykjavíkurkort á ensku í jafnstóru upplagi.
Í maí koma út önnur kort af Íslandi og Reykjavík í 80.000 eintökum hvort kort.

Feykileg eftirspurn er eftir þessum ritum.

Landshlutabæklinga voru gefnir út um alla hluta landsins í samvinnu við ferðamálasamtökin árið 2005 en áður voru gefnir út nokkrir bækingar í samvinnu við einstök landshlutasamtök.

Gistihandbókin Áning bættist í Heimsfjölskylduna árið 2002. Ritið er gefið út í 50.000 eintökum en það hefur að geyma upplýsingar um nær alla gististaði og tjaldstæði á landinu auk upplýsinga um sundlaugar. Þórður Sveinbjörnsson stofnaði Áningu og sér enn um sölu auglýsinga í ritið. Ottó Schopka er ritstjóri.
Hér má fá ritið á vefnum.

Haustið 2002 var gerður samningur við Stangaveiðifélaga Reykjavíkur (SVFR) um útgáfu Veiðimannsins og söluskrár SVFR. Ritstjóri Veiðimannsins er Bjarni Brynjólfsson. 

Hálendishandbókin er til á íslensku og ensku. Íslensku útgáfunni fylgir geisladiskur með myndum af öllum helstu vöðum á hálendinu.
 
Í desember 2000 kom út geisladiskurinn Best að borða ljóð með lögum Jóhanns G. Jóhannssonar við ljóð Þórarins Eldjárns. Það er mál manna að á diskinum hafi tekist að fanga einstaka leikhússtemmingu og fellur hann í góðan jarðveg þeirra sem á hlýða. Dóm um plötuna má finna hér.
Meðal söngvara eru Diddú, Örn Árnason, Edda Heiðrún Bachman, Bergþór Pálsson og Martha Halldórsdóttir.

Í október árið 2002 kom svo út geisladiskurinn Þóra og Björn með söng þeirra hjóna Þóru Einarsdóttur, sópran og Björns Jónssonar, tenórs. Á diskinum flytja þau á þriðja tug sönglaga frá mörgum Evrópulöndum. Flutningur þeirra við undirleik Helgu Bryndísar Magnúsdóttur hefur fengið mikið lof hlustenda og gagnrýnenda. Dóm um plötuna má finna hér.